Bawlhhlawh sâwngbâwl chungchang zirho ; kan rilru siam dik a ngai - Zodintluanga
UDPA department chuan nimin khan Aijal Club-ah 'Waste Management’ tih thupui zirhona an buatsaih a, UDPA minister Zodintluanga'n a hmanpui. Minister chuan, Mizote chu ram danga an zinin khawlaiah bawlhhlawh paih loin an awm thei a, mahse, Mizoramah an haw a, khawlaiah bawlhhlawh an paih leh mai ṭhin tih sawiin, "Kan rilru siam dik a ngai," a ti.
Solid Waste Management Rules, 2016 zirhonaah hian Zodintluanga chuan, faina chu mihring khawsak phung tehna pawimawh tak pakhat a nih thu sawiin, "Kan changkanna tehfung chu kan khawsak phung leh kan khawlai dinhmun aṭangin a hriat theih a ni," a ti a; Mizoramah kum 1977 aṭangin kum tinin Faina Hapta hman ṭhin a nih bakah, kohhran leh khawtlang nena ṭangrualin faina kawngah hmalak ṭhin a nih thu a sawi.
Zodintluanga chuan, Aizawl khawlaia bawlhhlawh paih, chil chhâk leh khawlai tibawlhhlawh thei thilte khapna tur dan, The Mizoram Municipalities (Third Amendment) Act, 2015 chu Assembly-ah pass a ni tawh tih sawiin, "Mahse, a kalpuitu tur AMC (Aizawl Municipal Corporation) lam an la inpeih lo a, AMC lamin chak zawkin hma la se a ṭha hle ang," a ti.
UDPA Minister chuan, faina leh thianghlimna kawngah chak taka hmalak a nih thu sawiin, "Aizawl khawpui hi páwn lama inthiar awm lohna, open defecation free (ODF)-a puan a ni tawh a, khaw dangte pawh ODF-a puan vek a nih theih nan chak taka hmalak mek a ni," a ti.
Aizawlah zirna in ṭhenkhat - Aizawl Theological College, Pachhunga University College leh AICS-ahte Zero Waste Management Programme kalpui mek a nih thu sawiin, he hmalakna zirna-in aṭangin bawlhhlawh chhuak tawh lo tura tih a nih thu a sawi.
Zodintluanga chuan, North Eastern Region Capital Cities Development Investment Programme (NERCCDIP) hnuaiah SIPMIU, Aizawlin Aizawl tan Solid Waste Management Sub-Project a kalpui mek thu te, Swachh Bharat Mission hnuaiah Kolasib-ah Solid Waste Management Centre buaipui mek a nih thu te, Lungleia Development of Solid Waste Management Centre dinna tur DoNER aṭangin sum hmuh a nih tawh thute a sawi a ni.
UDPA Minister chuan, NEDP hnuaiah kum 2016-17 aṭangin UDPA-in district headquarters pariat leh census town dang khaw 15-ah faina leh thianghlimna chungchangah hmalak a ni tih sawiin, "Mizoram Sanitation Task Force din a nih bakah, district tinah DC kaihhruaina hnuaiah Sanitation Task Force din a ni a, khawpui hrang hrangah inzirtirna kalpui a ni," a ti.
Workshop hi UDPA secretary Dr C.Vanlal-
ramsanga'n a kaihruai a, district hrang hranga nodal officer-te an tel. Solid Waste Management Rules, 2016; Plastic Waste Management Rules, 2016; Construction & Demolition Waste Management Rules, 2016; tun dinhmuna Aizawla bawlhhlawh sawngbawl dan dinhmun leh Scientific Management of Solid Waste tih thupuite zirho a ni.