National Dengue Day hman a ni ; Mizoramah Dengue vei tawh mi 791
Nimin khan Aizawl leh district dang ṭhenkhatah National Dengue Day hman a ni.
Aizawlah chuan Health Directorate conference hall-ah hman niin, National Health Mission (NHM) mission director Dr Lalrozama khuallian a ni a; Mizoramah Dengue vei mi 791 hmuh tawh niin, kumin bikah mi 34 hmuh tawh a nih thu tarlan a ni.
Aizawla National Dengue Day hmanna hi Vector Borne Disease state programme officer Dr HC Thangkima'n a kaihruai a, consultant Dr Zorammuana'n Mizoram leh India rama Dengue natna dinhmun a sawi.
Dr Zorammuana tarlan danin, Dengue natna hi Mizoramah kum 2012-ah hmuh ṭan a ni a, he mi aṭanga kumin April thla thlenga vei zat hmuh tawh chu mi 791 an ni. Kum khata hmuh chhuah zat an tam lutuk lo a, kum 2016-ah erawh Aizawla veng ṭhenkhatah a lên avangin mi 580-in an vei tih hmuh chhuah a ni thung.
Mizoramah Dengue vei thihpui an la awm lo a; thihpui an la awm loh chhan nia tarlan chu - Dengue hi serotype hrang chi ngaah ṭhen a ni a, Mizorama awm chu serotype-3, a hlauhawm nêp chi a nih vang a ni.
National Dengue Day hi Champhaiah chuan District Vector Borne Disease Control Programme bultumin IPR Conference Hall-ah hman a ni a, zirlaite tan painting compettition buatsaih niin, intihsiaknaah hian Champhaia high school pariat aṭangin zirlai 16 an tel.
Mizoramah Dengue
Kum Vei zat
2012 6
2013 7
2014 19
2015 43
2016 580
2017 136
2018 34