Damdawi khuahkhirh chungchang CYMA-in Health Minister an sawipui

Central YMA hruaitute chuan May 15, Thawhlehni khan Health minister Lal Thanzara a pisaah an kâwm a, mumal zawka damdawi zawrh a nih theih dan tur an sawipui.

CYMA hruaitute chuan, damdawi dawrte chu sumdawnna pangngai anga kalpui a nih ṭhin thu leh damdawi dawr nghaktute'n an damdawi hralhte an hriat chian loh fo avangin damdawi lama thiamna bik neite'n damdawi dawr nghak se an duh thu an hrilh a; chu chuan kawng tam takah zirlai naupang thlengin damdawi hmang sual a tihtlem tur thu an sawi.

Damdawi zawrh phalna licence neitu dik takin dawr hawng loin, mi hrang hrangin an hawh chhâwng nasa nia sawiin CYMA hruaitute chuan, chutianga thil dik lo tih chu tihzia­awm a nih theih nan ṭan lak a ngaih thu an sawi a; drug licence pek chhuah hnuah dik takin licence hman a nih leh nih loh en zui tura drug inspector-te an phût thu an sawi bawk.

Health Minister chuan, drug licence endik kawngah theihtawp chhuah a nih tur thu sawiin, CYMA thu thlen bawhzuina atan CYMA hruaitu te, drug inspector-te leh Mizoram Chemist & Druggist Association hruaitute nen inkawmna hun ruahman a nih tur thu a sawi a ni.