MZP hruaitute leh CM inkâwm

MZP hruaitute chuan nimin tlai khan chief minister Lal Thanhawla chu a pisaah an kâwm a; Mizoram leh Assam ramri, Mizorama Lokayukta din, zirtirtu sem rual leh CADC area-a Mizote'n harsatna an tawh chung­changte an sawipui.

MZP tarlan danin, Chief Minister hnenah hian MZP chuan Assam leh Mizoram ramri buaina chungchang an sawipui a; Innner Line Reserved Forest area endik (verification)-a Mizoram team leh Home department official-te nen ko kim zawkin May 21, 2018-ah inhmuh khawm turin thu an dah a ni.

Mizorama eirukna leh hlemhletna do thei tur Lok Ayukta chu kum 2018 ral hma ngeia hman a nih theih nana chak taka hma la turin MZP chuan CM Lal Thanhawla an ngen a; CM Hawla chuan, Lok Ayukta din tura an inpeih tawh thu leh din ­thuai a nih tur thu a lo hrilh.

Chakma Autonomuos District Council (CADC) chhungah Zo hnahthlak khua pathum - Saizawh West, Damdep leh Parva a awm thu sawiin MZP hruai­tute chuan, Mizo khaw pathumte hian CADC sor­kar aṭangin mipuite chanvo tur an dawn ngai loh thu leh CADC sorkarin a hlam­chhiah bik thu an sawi a; a ṭul anga hma la turin Chief Minister an ngen a ni.