Mizoram sorkar ṭanpui turin kan inpeih - Mizoram BJP President

Mizoram BJP hruaitute chuan nimin khan an pisaah thuthar thehdarhtute an kâwm a; an president Vanlalhmuaka chuan, khawvel ram hrang hranga Co­vid-19 léng mekah Mizoram sorkar ṭanpui tura an inpeih reng thu a sawi.

Vanlalhmuaka chuan, Covid-19 vangin chiai lo tur leh mahni mamawh bak thil chheprelh lo tura mi tin an ngen thu sawiin, "Kan Prime Minister zahawm takin a sawi angin India rama Covid-19 avangin ei leh barah, chawah harsatna a awm lo ang. Kan ram economy pawhin Covid-19 avanga a tawrh loh nan leh chutiang kawnga hmalak a nih theih nan Union Finance Minister kaihhruaina hnuaiah Covid-19 Economic Response Task Force siam a ni," a ti.

Mizoramin ei leh bàrah harsatna a tâwk dawn a nih chuan Economic Response Task Force chu ngen thiam a ṭul hle thu sawiin Vanlalhmuaka chuan, "Chumi atana chuan state sorkar ṭanpui turin Mizoram BJP a inring reng a ni," a ti a; medical leh health facility lamah state-in puih a ngaihna apianga lo pui turin Union Health Minister hnenah leh ei leh bar lamah harsatna tawh palha Mizoram sorkarin puihna a dil ang angah lo ṭanpui turin Union Finance Minister hnenah lehkha an thawn thu a sawi.

BJP President chuan, prime minister Narendra Modi-a'n March 22, Pathianni zing dar 7 aṭanga zan dar 9 chhung tumah páwnchhuak loa 'Mipui curfew' a puan te, tlai lam 5-a Covid-19 donaa thawktu doctor, nurse, paramedical, armed force, airport staff leh media-te leh Mizoramah chuan NGO-te inpeknaa lawmthu sawi nan minute 5 chhung mahni in aṭanga rî tichhuak tura a sàwmna chu zâwm ṭheuh turin mipui a ngen a ni.

Vanlalhmuaka chuan, mipuite'n awlsam taka mahni in aṭanga natna chungchanga harsatnate an thlen theih nan Narendra Modi sorkarin 'MyGov Corona Helpdesk' a siam thu sawiin, "Whatsapp no. 9013151515-ah hian ‘Hi’ tih thawnin, harsatna leh zawh duhte zawh theih a ni. Tun hi India mipuite kan inpumkhat hun, hmelma pakhat beia kan ṭan rual hun a ni tih hriain, mi tinin kan chhehvela mite tan harsatna siamtu ni lo a, invenna lam ngai pawimawh turin mipui kan ngen nawn leh a ni," a ti.