Video conferencing hmangin Court-in thubuai a ngaihtuah

Aizawl District & Session Court chuan March 19, Ningani aṭang khan video conferencing hmangin Aizawl District Jail leh Central Jail-a táng mekte thubuai an ngaihtuah.

Motor Accident Claim Tribunal (MACT) presiding officer Liansangzuala chuan, video conferencing hmang tur hian rules an la neih loh thu sawiin, "Mahse, Covid-19 léng mek avang hian Gauhati High Court chuan hmang mai turin min ti. Central Jail-ah phei chuan kum 2016 khan a khawl dah a ni tawh a, tunah chuan court room hrang hrangah pawh dah kim a ni tawh," a ti.

Liansangzuala sawi danin, video conferencing hmang hian jail táng mek­te thubuai ngaihtuah a ni a, police-in an man tharte erawh court-ah hruai an la ni thung. Police-in an man tharte hi darkar 24 chhunga magistrate hmaa hruai tur a ni.