Ramria police-te lak kir ṭhen an ni Vairengteah IR company la dah lo

Mizoram leh Assam-in ramria buaina a neih avanga Mizoram sorkarin ramria police a dah belhte chu tun hnaiah an headquarter lamah lak kir ṭhen an ni. Hetihlai hian Chief Minister sawi tawh Vairengtea IR police company dah tur chu dah a la ni lo.

Vairengte aṭanga Vanglaini thu dawn danin, tun hnaiah ramri buai avanga ramria police dah belh ṭhenkhatte chu an awmna headquarter lama awm leh turin lak kir an ni. Hetihlai hian ramri hmun hrang hrangah police an la duty reng tho a ni.

Vanglaini palai zawhna chhangin Kolasib SP Vanlalfaka Ralte chuan, ramri buai avangin ramriah police engemawzat dah an nih thu sawiin, "Office-a thawklai leh police station-a duty thlengin pawh an ni," a ti.

Kolasib SP chuan ramriah police dah hnem an nih avangin ramri loah police an indaih loh thu sawiin, "Kan inlak chhuah ṭhen rih loh chuan a ngaihna a awm dawn lo," a ti a, ramria duty turin police engemawzat chu an la awm reng thu a sawi.

Vanglaini thu dawn danin, tun hnaiah ramriah harsatna lian tham thleng a awm lem lo a, Bilaipur, Assam aṭanga Aitlanga Mizoram leh Assam Police duty-te hêla Mizorama rawn lut awm ṭhin chu helai hmuna ram neitu Mizote'n an rem ti tawh lo.

Hetihlai hian Vairengte khawtlang hruaitute'n August 23, 2021-a chief minister Zoramthanga a pisa-a an hmuh ṭumin, Vairengtea IR police company dah a nih tur thu a lo hrilh a; Vairengte khawtlang hruaitu-te'n thuthar thehdarhtute an hrilh danin, Chief Minister chuan Vairengtea IR company a ngheta dah a nih dawn thu leh an awmna hmun tur pawh tihfel vek a nih tawh thu a sawi a ni.

Nimina Vanglaini palaiin Vairengte khaw mi a biakte chuan IR police company an khuaah dah a la nih loh thu hi an sawi a, "An awmna tur tihfel tawh nia sawi ni mah se, hmalakna engmah a la awm lo," an ti.