High Court judge atan Marli Vankung la lut

President Ram Nath Kovind chuan, October 12 khan Gauhati High Court-a additional judge tur mi pali a ruat thar a, chung zingah chuan Marli Vankung, Republic Veng a tel. Marli Vankung hi nimin khan Guwahati-ah rinawmna thu tiam tira addl. judge atan lakluh a ni.

Supreme Court Colle-gium-in high court judge atana an rawt zingah Marli Vankung hi telin, President-in a pawm hnuah Gauhati High Court additional judge atan dah a ni ta a ni. A term chu kum hnih chhung a ni ang.

Marli Vankung hi kum 1989 khan Mizoram Judicial Service (MJS)-ah a tling a, Mizoram sorkar hnuaiah deputation-in Law & Judicial additional secretary leh secretary hnate a chelh tawh a, tunah hian Aizawl District Court-ah additional district & session judge a ni mek.

Marli Vankung hi Mizo zingah high court judge palina a ni a, Mizo hmeichhe zingah a hmasa ber a ni. Mizo zinga high court judge lo ni tawh leh ni mekte chu - T Vaiphei, Michael Zothankhuma leh Nelson Sailo te an ni.