Lungleiah oxygen plant hawn a ni

Lunglei South bialtu MLA Dr K Pachhunga chuan nimin khan District Hospital, Lungleiah PM-CARES Fund aṭanga a thlawna Mizoram sorkarin pressure swing adsorption (PSA) oxygen plant a dawn chu a hawng.

Dr K Pachhunga chuan tun hma ngaihtuahin Mizoramin hriselna kawngah hma a sawn thu sawiin, "Sorkar laipui hmalakna PM Cares Fund aṭanga Mizoram district hrang hranga oxygen plant bun a ni hi hmasawnna a ni. Lungleiah ngei pawh oxygen plant awm sa lêt nga zeta lian bun theih a ni chu Lunglei mipui tan a thlamuanthlak hle," a ti.

Lunglei DC hmalaknain CSR kaltlangin hriselna kawnga hmasawnna hmanrua cheng nuai 200 chuang man hmuh a ni tawh chu mipui tan malsawmna a nih thu sawiin Dr K Pachhunga chuan, "Oxygen-a chhim lam chawm thei tur khawl lian Southern Oxygen Generating and Refilling Plant pawh Lungleiah bun hna thawh ṭan mek a ni," a ti a, hnianghnar zawka mipui tan hman theih thuai a nih a beisei thu a sawi.

Thusawitu dang, Lunglei DC Kulothungan A chuan hri leng karah damlote hmakhua ngaihtuaha sorkarin oxygen plant a bunsak chu mipuiten ṭangkai taka an hman a duh thu sawiin, "Hun lo la kal leh zel turah pawh thawhhona ṭha nen hriselna lama hmasawnna kawngah theihtawp chhuah tlan a pawimawh," a ti.

Lunglei Civil Hospital medical superintendent Dr SR Ngurchamliana tarlan danin, PSA Oxygen Plant hawn tak hi minute khata oxygen litre 1000 siam chhuak thei a ni.