MNF-in an Diamond Jubilee Oct. 22-ah lawm ṭan dawn

14th October, 2021

Mizo National Front (MNF) chuan an kum 60 tlin (Diamond Jubilee) chu October 22, 2021 aṭangin an lawm ṭan dawn a, a hawnna hun Vanapa Hall-ah an buatsaih ang.

MNF Diamond Jubilee Celebration Committee chu nimin khan Hnam Runah an chairman Vanlalzawma, vice president hoin an ṭhukhawm. Vanlalzawma chuan MNF party chu khawvel huap pawha party upa pawl tak a nih thu sawiin, "Harsatna tam tak kara he party Pathianin a hruaina hi a ropui hle. MNF hi party danglam tak, Pathian leh kan ram tan ti tlattu a ni," a ti.

Meeting-ah hian Diamond Jubilee lawmna chu hripui leng avangin duh angin hman theih a nih dawn loh thu tarlan a ni. Ruahmanna an siam dan chuan jubilee lawmna hun October 22, 2021 ah hman niin, October 22, 2022 ah khar a ni ang.