Sorkar thu lo ngaichang rih turin Minister-in vawk vulhtute a ngen

AH & Vety minister Dr K Beichhua chuan, nimin khan Mizorama African Swine Fever (ASF) hmuh ṭanna hmun Lungsen, Lunglei district a tlawh a, vawk vulhtute chu sorkar thu ngaichang turin a ngen.

Lungsen YMA Hall-a khawtlang hruaitute nen an inkawmnaah AH & Vety Minister chuan vawk vulh bul ṭan ṭhat lehna atan ram pawn aṭanga lakluh duh an awm leh tawh tih sawiin, "Sorkar hian kan ram mipui tana ṭha ber tur a ngaihtuah ṭhin a, kan mithiamten 'a him tawh e' an tih hunah chuan a ṭul angin mipui tan department pawhin vawk no ṭha chu a lalut thei a ni. Vawk vulhtute sorkar thu lo ngaichang turin ka ngen," a ti.

Dr K Beichhua chuan, vawk pul hri leng chungchangah Lungsen mipuite dinhmun a hriatthiampui thu leh zangnadawmna pe thei turin sorkar laipuiah theihtawp chhuaha an beih mek zel thu a sawi.

Social Welfare changtu ni bawk Dr K Beichhua chuan, Lungsena Eklavya Model Residential School din tur chungchangah central lamin VC pass-te a lo rem tih loh avangin Revenue department-ah lehkha a kal mek tih sawiin, "Tihfel a nih hunah hna pawh ṭan theih thuai a beiseiawm," a ti.

Minister ṭawiawmtu AH & Vety Board vice chairman C Lalmuanpuia, MLA chuan, "He hri leng hi vawk vulhten inzirna atan hmang a, beidawng lo a, chakna petu atan hmang se ka duh," a ti a, sorkar thupek kan zawm ṭhat zel chuan engtik niah emaw chuan saah Mizoram a intodelh ngei a beisei thu a sawi.

AH & Vety Minister hi secretary Lalzarmawii leh director Dr H Laltlan-mawiate pawhin an ṭawiawm.