Tuirial bial MLA by-election neih tur atan Political party-te ngawrh takin an campaign

October 30, 2021-a Tuirial bial MLA by-election neih tur atan political party hrang hrangte bial chhung khaw hrang hrangah ngawrh takin an campaign mek.

An thuhchhuah aṭanga a lan danin, political party hrang hrangte hian mi engemawzat an party-ah an lawmlut tawh hlawm. Party hrang hrangte'n khaw hrang hrangah campaign kickoff an buatsaih bakah, campaign office hawn inkhawmte an buatsaih ṭhin.

MNF
MNF chuan Thawhlehni khan Kawnpuiah campaign office hawn inkhawm an buatsaiha, thusawitu MNF adviser Dr K Beichhua'n campaign office hi a hawng.

Dr K Beichhua chuan, "He bial hi bial entawntlak leh hmasawn duh in ni tih kan hria. In bial tana hmasawnna a taka a thlen theihna turin MNF party chuan mi viak ṭha, a ngaihna hria leh bial tana engkim huamtu kan rawn dah a ni. Khaw dang hawi loa in vote tlin ngei dawn avangin in chungah lawmthu ka sawi lâwk a ni," a ti.

MNF Adviser hian Serkhanah Serkhan MNF Unit-II (Gorkha) a dinpui nghal.

MNF candidate K Laldawngliana chuan politics game verther a nunah a tel ve loh thu sawiin, "Thil chu a nihna anga lanpui mai chi ka ni. He bial hian bial dangte anga hmasawnna neih kan mamawh. Chumi ti thei tur chuan bial mipuite hi thawhpuiah ka sawm che u a, he bialah hian awm tur awm lo a tam. Ke i pen ho ang u," a ti.

Congress
Congress party chuan nimin khan Kawnpuiah campaign office hawn inkhawm an buatsaih a, thusawitu Congress Legislature Party (CLP) dy. leader C Ngunlianchunga chuan, "Lawngtlai leh Siaha district MLA bial panga-ah ZPM tan chance a awm lo. Lunglei leh Hnahthial dist.-a MLA bial 12-ah pawh MLA pakhatmah an nei lo," a ti a, hmar lam ringawt aṭangin a sorkar theih loh thu a sawi.

C Ngunlianchunga chuan MNF chu SEDP cheng nuai thum beisei avanga mipuiin an vote tlin a nih thu sawiin, "Nuai thum dawng kan awm tawh em? Covid-19 vanga thi tam tak kan awm tawh chungin, Aizawlah chauh hian ventilator vuah theihna a awm. Zoram khawpui hmun dangte hi sorkar hian min ngaihtuah thlawt lo a ni," a ti.

Congress candidate Chalrosanga Ralte chuan an party-in sorkarna kum 10 an chan chhungin ram rotling tam tak an tih thu sawiin, "Chutih rual chuan tihdik loh leh tihfuh tawk loh kan nei tih kan hria. Chungahte chuan mipuite hnenah ngaihdam kan dil a ni," a ti a, a tihsualte an tih nawn tawh loh tur thu a sawi.

ZPM
ZPM working president K Sapdanga chuan Congress leh MNF-ten kum 35 ro an inrel chhawk chhunga min hruaithlenna chu - India rama state thawhchhuah nei tlem ber, power nei tlem ber, kawng nei biboh ber, cancer vei tam ber leh HIV+ve tamna berah a nih thu sawiin, "Tunah Covid-19 kai rate sanna ber kan ni mek," a ti.

Nimina Khamranga an party campaign office a hawnnaah thu sawiin K Sapdanga chuan, "Kan ram leh hnam chhan tur hian sum leh pai hausakna a ngai lo - dikna, rinawmna leh huaisenna hi a tawk em em a ni. Kalphung thar thlifimin ram pum a tuam mek," a ti a, dik lohna hnawl a, Pathian duh zawng hmanrua chauh hmanga hnehna chan tuma bei turin Zoram kil tina ZPM a sawm.

ZPM candidate Laltlanmawia chuan kan ram awm mek dan siam ṭha thei leh siam ṭha ngam tur party awm chhun chu ZPM a nih thu sawiin, "Kan ram awm mek dan hi a tawk e, ti ringawt tur kan ni lo. Kan ram hian a ṭha zawk kawng a zawh thei tih hi kan ring tlat tur a ni,” a ti.