CEO in tlawmngai pawlte a kawm

Mizoram chief electoral officer P Jawahar chuan, nimin khan NGO hrang hrang aiawhte Secretariat conference hall-ah a kawm a, electoral roll aṭanga Tripura transit camp-a khawsa mek Bru voter-te hming paih chhuah chungchangah Election Commission of India nen an indawr mek thu a sawi.

P Jawahar chuan Mizoram electoral roll aṭanga Tripura Camp-a cheng mek Bru-te hming paih tura NGO leh political party hrang hrang aṭanga ngenna a dawn chu ECI hnenah thawn a nih tawh thu a sawi a, "ECI aṭangin chhanna nghah mek a ni. ECI-in inthlan a puan tawh angin ECI guidelines zawmin Election department chuan inthlan awm tur atan inbuatsaihna a kalpui mek zel a, boruak muanawm hnuaiah inthlan felfai neih a nih ngei ka beisei," a ti.

CEO chuan MCC of 2019 Manual Chapter 20, point no 20.8.2-in a tarlang angin inthlan atana campaign-naah sakhuana emaw hnam bil thil thu emaw hmangin thutiam/thuchhuah siam phal a nih loh thu a sawi bawk.