Covid-19 vangin mi 370 thi tawh

Information and Public Relations (IPR) department-in a tarlan danin, nimin tlai dar 5 thleng khan Mizoramah Covid-19 vangin mi 370 an thi tawh a, India rama hri vei hmuh chhuah aṭanga thihpui tlem lamah pahnihna a ni.

October 11, Thawhṭanni khan Van-ṭhuami (88), Khuangleng chu an chenna inah a thi. October 5 khan hri a kai tih hriat chhuah niin home isolation-a enkawl a ni.

V Dawmai (75), Vaihpi, Siaha chu Thawhlehni chawhma dar 10 khan Siaha DCHC-ah a thi a, natna dang nei tel a ni. October 11, Thawhṭanniah hri a kai tih hriat niin hemi ni vek hian DCHC-ah admit a ni.

Lalnunzira (42), Venglai, Hnahthial chu Thawhlehni tlai dar 5:30 khan thawhah vangin an chenna inah a thi a, a thih hnuah hri a kai leh kai loh test niin hri a kai tih finfiah a ni.

F Kalvaria (70), Hnahthial chu October 12, Thawhlehni zan 6:45 khan ZMC-ah a thi. October 6 khan hri a kai tih hriat niin he mi ni vek hian ZMC-ah admit a ni a, natna dang nei tel a ni.

Joycee Laldinpuii (45), Mission Veng chu Thawhlehni zan dar 7:30 khan ZMC-ah a thi. October 10 khan hri a kai tih hriat chhuah niin hemi ni vek hian ZMC-ah admit nghal a ni a, natna dang nei tel a ni.

Sangliana (77), Bethlehem Veng chu Thawhlehni zan dar 7:30 khan ZMC-ah a thi a, natna dang nei tel a ni. September 11 khan hri a kai tih hriat niin September 20 khan ZMC-ah admit a ni.

Nimin chawhma dar 10:45 khan R Tawnluia (97), Zotlang, Aizawl chu MINECO DCHC-ah a thi. October 3 khan hri a kai tih hriat chhuah niin hemi ni vek hian DCHC-ah admit a ni.