KHAWTHLIR

Thisen pe
J Thankima College NSS unit chuan nimin khan an college hall-ah thisen pek an huaihawt a, Aizawl Civil Hospital tan thisen unit 65 an pe. Thisen petute hi mipa 52 leh hmeichhia 13 an ni.

Inhnukdawk awm lo
October 30, 2021-a Tuirial bial MLA by-election lo awm tur atana chuh tuma hming pe lutte tana inhnuhdawhna hun chu nimin tlai dar 3 khan a tawp a, inhnukdawk an awm lo. Inthlan hi BJP, INC, MNF leh ZPM candidate-te'n an chuh dawn a, October 30-a vote tlate chu November 2-ah chhiar a ni ang.

Lehkhabu tlangzarh
MYC chairman Dr Vanlalṭanpuia, MLA chuan nimin khan Lunglei Convention Centre-ah Postal department buatsaih, 'Special Cover on Darthawma Renthlei' leh, Familia Fanai Laltlansanga ziah, 'Freedom Fighter Darthawma' tih lehkhabu a tlangzarh.

Ambulance hlan
East Tuipui bialtu MLA Ramthanmawia chuan, nimin khan a bial chhunga Sesih PHC-a hman turin MLA fund aṭanga a lei ambulance (Maruti Eeco van) chu medical officer Dr Eric Zaukhnin hnenah a hlan a; Sesih PHC in a huam Sesih, Khuangleng, Lianpui leh Leisenzo khuate bakah a chhehvel hnaivaia mite'n ṭangkai taka an hman a beisei thu a sawi. Lunglei DC Kulothungan A pawhin nimin khan National Projects Construction Corporation Ltd. (NPCC) in CSR kaltlanga ambulance a pek chu Tlabung senior medical officer Dr R Lanienga hnenah a hlan.

Boxer chawimawi
Mizoram Boxing Association (MIZBA) chuan, nimin khan Asian Elite Men & Women Boxing Championship 2021-a silver medal dawngtu Lalbuatsaihi chawimawina hun Aijal Club-ah an buatsaih a, Sports & Youth Services minister Robert Romawia Royte chuan hmanpuiin Mizoram sorkarin lawmpuina Rs. 5,00,000 pek a tum thu a sawi.