Covid-19: Mizoram dinhmun ; Hri vei 1,224 hmuh belh a ni

October 12, Thawh-lehni khan Mizoramah Covid-19 hri vei 1,224 hmuh chhuah a ni a, nimin khan tlai dar 5 thlengin hri vei dam tawh mi 955 chhuahtir an ni.

Thawhlehni tlai dar 5 aṭanga nimin tlai dar 5 thleng khan Covid-19 vangin Mizoramah mi panga an thi a, hripui vanga thi zawng zawng chu 370 an tling tawh.

Covid-19 vei October 12-a hmuhte chu RAT hmanga hmuh 642, RT-PCR hmanga hmuh 449, TrueNAT hmanga hmuh 116 leh Fluorescent Immunoassay (FIA) hmanga hmuh 17 an ni.

IDSP record angin, Mizoramah Covid-19 vei 1,08,790 hmuh chhuah a ni tawh a, mipa 53,281 leh hmeichhia 55,509 an ni. Nimin tlai dar 5 thleng khan mi 94,894 (87.22%) chhuahtir an ni tawh a, mi 370 (0.34%) thi tawhin, enkawl mek mi 13,526 (12.43%) an awm.

October 13 Thawh-lehnia hri vei hmuh chhuah 1,224-te hi mipa 583 leh hmeichhia 641 an ni a, an zinga mi 478 (39.05%) in symptoms an nei. Nimin khan tlai dar 5 thlengin hripui laka fihlim tawh mi 955 chhuahtir an ni a; Aizawl district-ah mi 709, Kolasib district-ah mi 63, Lawngtlai district-ah mi 54, Champhai district-ah mi 53, Siaha district-ah mi 29, Mamit district-ah mi 26, Khawzawl district-ah mi 12 leh Hnahthial district-ah mi pakua an chhuak.

Mizorama Covid-19 vei hmuh tawh 1,08,790 chu mi 1,000 zelah hripui vei mi 99 an awm ang a ni a; mi 1,00,000 zelah Covid-19 vangin mi 33 an thi tawh ang a ni bawk. Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 1,04,253 chu Mizoram chhunga kái chhâwng an ni a, mi 4,537 chu Mizoram páwn aṭanga an rawn luh hnua hmuh chhuah an ni.

Sorkar laipuiin nimin zinga India ram Covid-19 dinhmun a tarlan danin, Mizorama hri vei hmuh chhuah tawh aṭanga enkawl mek dinhmun (percentage) chu a a tlahniam zel a; October 10, Pathianni zinga sorkar laipui report-ah Mizorama enkawl mek chu 14.77% a ni a, Thawhṭanni zingah 13.47%, Thawhlehni zingah 13.37% leh nimin zing khan 13.31% a ni. Hetihrual hian Mizoram chu India rama hri vei hmuh chhuah tawh aṭanga enkawl mek tam berna state a ni chhunzawm zel thung.

Thawhlehni khan hmarchhak state pasarih; Assam-ah hri vei 226, Manipur-ah 120, Meghalaya-ah 93, Sikkim-ah 21, Arunachal Pradesh-ah 18, Nagaland-ah 19 leh Tripura-ah 15, a vaiin 512 hmuh chhuah a ni a, Mizorama hmuh 1,224 nen belhkhawmin 1,736 a ni. Hmarchhak state pariata Thawhlehnia hri vei hmuh thar 1,736 aṭanga 70.50% (1,224) chu Mizorama hmuh chhuah a ni.