NH-6 bypass road-a harsatna sawiho

National Highway No. 6 bypass road chungchangah Khawzawl DC CC Lalchhuangkima chuan October 12, Thawhlehni khan Puilo rama Dhariwal Buildtech Limited (DBL) camp-ah NHIDCL, Kawlkulh leh Dulte Joint Action Committee for NH-6 leh Dulte Economic Growth & Development Committee hruaitute a kawm a, harsatna an neihte a sawipui.

He hunah hian JAC for NH-6 leh Dulte Economic Growth and Development Committee hruaitute chuan, an khawtlang tana ṭha tur nia an hriat leh mipuite hmakhua ngaihtuah nia an inhriat dana hma la an nih thu an sawi a, "NH-6 laih mekin Kawlkulh leh Dulte khua a paltlang theih nana hma kan laknaah mimal tumah huat kan nei lo a, kan hmalakna hi zangnadawmna (compensation) beisei vang mai nia thuthang awm ṭhin hi a dik lo," an ti a; NH-6 bypass road chuan Kawlkulh leh Dulte khua a paltlang dawn lo a nih chuan an ram chinah kutthlak an phal dawn lo tih an sawi a, Bawrhsap hnenah ngenna an thehlut nghal a ni.

CC Lalchhuangkima chuan JAC for NH-6 leh Dulte Economic Growth and Development Committee-te ngenna thlen chu zirchianga bawhzuipui a inhuam thu a sawi a, "Thutawp siamtu tur ka nih loh avangin thuneitu sang zawkte thutlukna chu eng pawh ni se pawm thiam turin ka duh che u a ni," a ti a, NHIDCL leh Dhariwal Buildtech Limited hotute chu hmalak ho dan tur a sawipui nghal.

Puilo khawtlang hruaitute chuan NH-6 laih mek chuan Kawlkulh leh Dulte chu paltlang ve se an duhpui thu an sawi rualin, Puilo ram chhunga khawtlang tiralmuang lo leh nunau tithlabar zawnga hmalakna awm ṭhin chu ti tawh lo turin Khawzawl DC chuan Kawlkulh leh Dulte khawtlang aiawhte a ngen a ni.