Vairengtea police company khat dahna atan nuai 223 ruahman a ni tawh - Home Minister

Mizoram Police Service Association (MPSA) chuan nimin khan 3rd Bn. MAP ground, Mualpuiah khawmpui an hmang a, an hun hmanpuitu Home minister Lalchamliana chuan Vairengtea police company khat dahna atan cheng nuai 223 ruahman fel a nih tawh thu a sawi.

Home Minister chuan ramri venhim sorkar thil ngaih pawimawh ber pakhat a nih avangin Vairengteah Mizoram Police company khat dah tum a nih thu sawiin, "Hemi senso atan hian cheng nuai 223 ruahman fel a ni tawh. Police mamawhna a san rualin Covid-19 avanga India ram pum huap anga sum leh paiah harsatna tawh a nih avangin police hnaruak hnawhkhah ngai la hnawhkhah theih loh sang tel teh meuh a awm," a ti.

Lalchamliana chuan Covid-19 avanga Mizoramin hun harsa a paltlang mek lai hian Mizoram Police-te ṭangkaizia leh thawhhrimna mipuiin an hre chiang thar leh tih sawiin, "Ramri avanga buaina a chhuah takah phei chuan state dang police-te khaikhina tlem zawk fe ni mah se, Mizoram Police inpekna leh huaisen ziate kan hmu chiang a ni," a ti a, police-te chu Mizo mipuite'n an thlamuanpui thu a sawi.

State chhung ralmuanna atan leh dan leh thupek kenkawh kawngah harsatna liantham a awm loh nan sorkar chuan police hnaruak hnawhkhah a ngaih pawimawh thu sawiin Home Minister chuan, "Covid-19 hrileng a zia awm hunah leh sum leh paia kan state dinhmun a ziaawm hret hunah heng police hnaruakte hi hnawh khat turin department chu a inpeih sa reng a ni," a ti.

Home Minister chuan MPS-te fuihna thu sawiin, "Mizoram Police atana a banpui leh dinhmun pawimawh ber chelhtu in nih angin in ṭan mar pat a ngai," a ti a, police officer-te chu team leader an nih angin hruaitu ṭha nih tuma, an naute thawhpui thiam tur leh an naute duhsak theihnghilh lo turin a chah.

Thusawitu dang chief secretary Lalnun-mawia Chuaungo chuan sorkar hmelhmang hmuh awlsamna ber chu uniform ha police-te an nih thu sawiin, "State pawn lam aṭanga Mizoram hmelhmang an hmuh hmasak ber pawh Traffic Police-te leh police duty-te an ni. Mizoramin hun harsa a tawh laiin police-te hnathawh a fakawm hle," a ti.

Inkhawm hi MPSA sr. vice president Zosangliana'n kaihruaiin, IGP (Hq.) John Neihlaia pawhin thu a sawi. MPSA khawmpuiah hian chawhnu lamah rorel inkhawm leh hruaitu thar thlanna hun hman a ni.