Mizo hming hawha sumdawngte endik

Mizoram Merchant Association (MIMA), Panhnah Zuar Association leh Mizoram Police-te chuan nimin zing khan New Market leh Zarkawta Mizo hming hawha hnamdang sumdawngte an endik a, dan loa sumdawng an hmuhte chu police-te'n an man.

MIMA chuan nimin zinga mante hi police-te chuan Court-ah an hruai dawn thu tarlangin, "Court lam hian lo chhuah mai loin, man an nih chhan hrechianga, hmalatute lam Court-ah koin thu zawtfiahve ṭhin se kan ti hle. Kan ram leh hnam tan hian tupawhin ngaihtuahna thar nen chet kan lak hram hram hi a pawimawh tak zet a ni," an ti.

Dan dik loa Mizoram sumdawngte chu an phu ang ngeia hrem nise an duh thu sawiin MIMA chuan, "A ṭul anga thawnlet thleng pawha hmalak nise kan duh," an ti a, dan loa sumdawngte endik zel an tum thu an sawi.

MIMA chuan an ngenna ngai pawimawha Aizawl SP-in anmahni puibawm tura police a tirh avanga an lawm thu tarlangin, "Police-te nen dan hnuaiah lungrual taka ILP thlenga kan check thei hi a lawmawm tak zet. Sorkar pawhin hnam rilru puin theihtawp min chhuahpui kan ring tlat," a ti.

Dan loa sumdawngte endik an ni dawn tih an hriat avangin hnamdang sumdawng engemawzat chu an lo tlanchhe hman a ni.