MPF-in candidate palite an kawm

Mizoram People's Forum (MPF) gen. hqrs. hruaitute chuan nimin khan Synod committee room-ah Tuirial bial MLA by-election lo awm tur candidate - K Laldinthara, Chalrosanga, K Laldawngliana leh Laltlanmawiate an kawm.

Inkawmhona hi MPF vice president Rev. K Lalrinmawia'n kaihruaiin, general secretary Rev. R Lalnuntluanga'n Tuirial bial by- election lo awm tura inthlanna felfai leh thianghlim a awm theihna tura a hmalakna hrang hrang a tarlang.

Candidate-te pawhin thu sawiin inkawmhona hun buatsaih a ni hi chu lawmawm an ti a, party leh MPF thawhhona thuthlung ṭha taka zawm a nih theihna atan theihtawp chhuah an tum thu an sawi hlawm.

Candidate-te chuan mipuiin an laka an beiseina nasa lutuk avanga harsatna an tawh ṭhenkhatte an sawi chungchangah MPF hruaitute chuan, thawhhona thuthlungin a phal bakah chuan candidate-te lakah beisei nei lo turin mipuite an ngen nghal a ni.