Inkaihhruaina thlahdul hret hnuah dan bawhhchhia man tur an tam - Excise department

Excise & Narcotics department (END) chuan October, 2021 chhungin ruihhlo kaihhnawihah dan bawhchhia mi 207 an man tawh. END chuan Covid-19 inkaihhruaina thlahdul hret hnuah dan bawhchhia an man hnem chu thuchhuah siamin an tarlang.

END chuan tunlaiin Mizoram hmun hrang hrang, a bikin Aizawl chhehvel - Phunchawng leh Rangvamualah dan phal loha zu siam leh kawl an man nasat thu tarlangin, "Rangvamual leh Phunchawng daia zu siamna hmun engemaw zat luhchhuahin nitin zu siamna tam tak tihchhiat ṭhin a ni," an ti.

October 13 khan Tuikhurhluah rakzu litre 338, zubilhlai ṭin 893, beer litre 444 leh zu siamna hmanrua engemawzat an man thu tarlangin END chuan, "Heng zu leh a kaihhnawihte hi vawk-in hluia siam an ni," an ti a, African Swine Fever avanga vawk a thih zawh avangin remchangah lain vawk-in hlui hi zu siamna atan hman a nih thu an sawi.

END chuan zu leh ruihhlo leh a kaihhnawih dapa kawngpuia an duty ṭhin bakah Covid-19 inkhuahkhirhna dan bawhchhia dapin kawngpui dung hmun hrang hrangah ngawrh takin an duty mek tih tarlangin, "Covid-19 inkaihhruaina thlahdul hret hnuah dan bawhchhia ṭhahnem tak kan man," an ti.