Dan loa kuhva leh sumdawnna phur lirthei tlan khap

Champhai district magistrate Maria CT Zuali chuan nimin khan Champhai district-ah dan loa kuhva leh sumdawnna thil dang phur lirtheite thla hnih chhung tlan khap a nih thu a puang. Thupek zawm lote chu IPC section 188 hmangin hrem an ni ang.

Maria CT Zuali chuan lirtheia dan phal loh phur ṭhinte vangin kawng siam tharte a chhiat chak thu leh kawng siam hna kallai mek a tih ṭhuanawp nasat thu a tarlang a, "Dan loa kuhva leh sumdawnna dang kalpui lirtheite vahvelna avanga kawng chhiat phah chungchangah kiltin aṭanga sawiselna leh rang taka hma la tura ngenna a luh avangte leh October 12, 2021 a Lok Sabha MP hoa DISHA meeting-ah pawh sawi chhuaha enzui tura thu dah a nih avangin district pumpuiah dan loa kuhva leh sumdawnna thil dang phur lirthei reng reng tlan khap a ni," a ti.

Thupek bawhzuina kawngah khaw tin VC-te chu theihtawp chhuah tura hriattirin District Magistrate chuan, thupek palzuttute chungah dan anga hma lak a nih ngei theih nan department kaihhnawih leh VC-te chu dan leh thupek kengkawhtute hriattir zel tura tih an nih thu a tarlang bawk.