KHAWTHLIR

Thisen pe
Kanan Veng Branch YMA chuan an din champha vawi 48-na lawm nan nimin khan an veng hall-ah thisen pek an huaihawt a, Civil Hospital, Aizawl tan thisen unit 35 an pe.

Morgue van hlan
Mizoram Rural Bank (MRB) chuan nimin khan CSR kaltlangin Christian Hospital, Serkawn hnenah morgue van an hlan a, hospital aiawhin director Dr Lalramzauva'n a dawng. MRB chairman V Jaya Chandra chuan morgue van chu hman ngai loa awm theih ni se tih chu mi tin duhdan ni mah se, hringnunah a beh tlat si avangin, thihna tuartute'n an chhiat tawh karah an hmangaih takte thlamuang taka an hmun an thlenpui theihna atana hlan an nih thu a sawi.

Minister-in hawng
Social Welfare minister Dr K Beichhua chuan nimin khan Eklavya Model Residential School (EMRS), Pukpui, Lungleiah building thar pali a hawng. Building thar pali hawn takte hi Ministry of Tribal Affairs aṭanga cheng nuai 331.87 hmuh aṭanga sak niin, girls dormitory, boys dormitory, additional classroom leh staff quarter building-te an ni.

E Roll tlangzarh
Election Commission of India-in thupek a chhuah angin Tuirial bial by-election neih tur atana Photo Electoral Rolls, 2021 chu nimin khan mipui a duh apiang en theih tur tlangzarh a ni. Electoral roll thar hi Kolasib District Election Officer pisa, Tuirial bial ERO/ AERO leh BLO pisa-ahte en theih a ni. Roll thar ang chuan Tuirial bialah hian vote nei mipa 8,819 leh hmeichhia 9,092 an vaiin 17911 an awm.

Halpuah khap
Aizawl district bawrhsap Dr Lalhriatzuali Ralte chuan nimin khan thupek chhuahin, Krismas leh kumthar bakah Hindu kutpui, Dussehra leh a dang lo thleng turah halpuah, halmawi, sky lantern leh silai lem (a mu kap chhuak thei chi) lakluh, zawrh, hralh, hal leh hman a khap a, dan bawhchhiate chu IPC section 188 hmangin hrem an nih tur thu a tarlang.