ZPM-in Tuirial bialah street campaign an buatsaih

ZPM Ṭhalai chuan tunlai hian Tuirial bial MLA by-election lo awm tur pualin street campaign an buatsaih ṭhin a, an president Malsawmzuala Ralte chuan, "Kan chhungkaw khawsak phunga beiseina chhete min siam saktute hi ram hmangaihtu an ni thei lo," a ti.

Malsawmzuala chuan kan thlir tawi ang bawka thlir tawi ram hruaitu neih phu tawk leka khawsa tawh lo tura mipuite sawmin, "Politics-a kan kal fuh lohna tireh theitu in ni mêk. Thawhrimna tel lo sum chu ho taka a luan ral leh mai ṭhin," a ti a, kan ram a hnufual nachhan kan ram hruaitute mawh a nih rualin, ram hruaitu dinhmuna hlângkâi theitu mipuite'n mawh an phur ve tho thu a sawi.

MNF hruaitute'n mipui an hmangaih thar thut tih sawiin ZPM Ṭhalai President chuan, "A hma zawng pawha engmah sawi si loa, tuna taka mipuite rawn hmangaih thar thut an ni. Serchhip by-election dawnah pawh khan Serchhip mipuite an han hmangaih tak tak mai a, an tiam kur lêk lûk a, tun thlengin engmah an hre zui tawh lo" a ti.