Pisa tihchangtlun dan tur sawiho

Land Revenue and Settlement (LRS) minister Lalruatkima hoin nimin khan Khawzawl, Hnahthial leh Saitual bawrhsapte leh settlement officer-te chuan an district ṭheuha Revenue pisa tihchangtlun dan tur an sawiho. Minister chuan thawktu indaih lohna nasa hle mah se, mipui mamawh phuhru tura insanmar lehzuala tih dan kawng zawn hram a ṭul tih a sawi.

Lalruatkima chuan hripui lengin a nghawng sum leh pai harsatna avangin sorkar hna lak a harsat thu a sawi a,"Thawktu indaih lohna nasa hle mah se mipui mamawh phuhru tura insanmar lehzuala tihdan kawng zawn hram a ṭul a ni," a ti a, mipuiin an dawr nasat department an nih avangin district tharah te hian changtlung leh mumal zawka an kal a ṭul thu a sawi.

Meeting chuan district thar pathum te hian assistant survey director (ADS) an la neih loh avang leh dah mai tur an awm loh avangin ruahmanna siam nise an ti a; Saitual district chu Aizawl ADS in a vil anga, Khawzawl chu Champhai ADS leh Hnahthial chu Lunglei ADS in a vil ang. An ruahmanna hian thawktu thar dah theih loh avanga district thar pathumin in leh huan pass - technical checking-a harsatna an tawh mek chu hun eng emawchen atan a sutkian theih an beisei.

District thar pathum Revenue pisaa clerical staff indaih lohna nasa tak chungchangah staff mamawh zualpui pahnih khat chu DC ruahmannaa dah lailawk turin an ngen a, land committee din lohna khuaah din ngei nise an ti bawk. Sorkar ruahmanna dinglai angin Revenue pisa chu DC tinte'n Mini Secretariat building an sak turah an khung tel dawn a ni.

He hunah hian district pathum DC leh an aiawhte bakah LRS secretary R Zarzosanga leh department hotute an tel.