Women Helpline in call 9,089 dawng tawh

Women Helpline Mizoram Steering Committee chairman Dr Lalhriatzuali Ralte, Aizawl DC leh assistant commissioner Priyank Kishore-te chuan nimin khan Women Helpline Mizoram (WHL) Office an tlawh a, an inrelbawl dan leh hnathawh dante an enfiah.

WHL Mizoram hi April 2016 aṭanga hawn ṭan a ni a, hawn a nih aṭanga September, 2021 thleng khan helpline (toll free number 181) chu hmeichhia harsatna tawkte'n vawi 9,098 an be tawh. Heng zinga a tam ber chu inchhungkhura hleilenna chungchang a ni a, an case dawn tawh zawng zawng aṭanga 61% a tling.

Anmahni pantute zingah kum 21-40 inkar (59%) an tam ber a, 38% chu pasal nei lai an ni a, pawikhawihtu (accused) zingah an pasalte an tam ber bawk. Pawikhawihtu zinga a tam zawk hi zu in mi an ni a, zu vanga buaina pawh a sang hle.