Jan Suwayi and Awareness Week hawng

Rural Development (RD) minister Lalruatkima chuan nimin khan DRDA conference hall-ah Mizoram Social Audit Unit (SAU)-te butsaih kar khat awh tur state level MGNREGA social audit 'Jan Suwayi and Awareness Week' a hawng.

Lalruatkima chuan social audit chu RD department hnuaia hnathawh hrang hrangte langtlang leh mipui tana chhawrnahawm lehzuala thawh theih nan a pawimawh tih sawiin,"Department dang a awm ve lo SAU kan neih hi thil ṭangkai leh ṭha tak a ni. SAU-te hmalaknain vantlang rorel (gram sabha) kaltlanga RD hnathawhte kum khatah vawi hnih audit ziah hian inthlahdah tur a veng a ni," a ti a, SAU-a tel tlawmngai pawlte chu theihtawp chhuaha ṭan lakpui turin a sawm nghal.

SAU hi kum 2012-a din a ni a, khaw 2,192-ah social audit neih a ni tawh. Kum 2021-2022 bikah khaw 237-ah social audit neih tawh niin, MGNREGA, PMAY-G leh NSAP-ah te audit an kalpui mek a ni.

He hunah hian RD department, CYMA, MUP, MHIP leh Village Council aiawhte an tel a, social audit lama mithiam hrang hrangte'n social audit kalpui dan leh a pawimawhnate an sawifiah a ni.