Bru-te'n an camp-a vote an thlak lohna atan Jt. NGO-in sorkar laipui an dawr dawn

Jt. NGO Co-ordination Committee nimina Central YMA committee room-a ṭhukhawm chuan, kumin MLA inthlana Tripura refugee camp-a Bru awmte'n an camp-a vote an thlak lohna atan sorkar laipui thuneitute dawr an rel.

Jt. NGO chuan kum 2014 MP inthlana Bru-te an camp-a vote thlak tir an nih duh lohna an lantir ṭumin Election Commission of India (ECI) chuan Bru-te hi an camp-a vote thlaktir tawh loh an intiam thu tarlangin, "2018 MLA Election kan hmachhawn turah hian, Bru-te'n Tripura Camp aṭanga vote an thlak tawh lohna turin ECI dawr turin lam kal in tirh se. Ni 28.5.2018 hian Delhi-ah pawl hrang hrang president ṭheuh hemi chungchanga Home Ministry leh ECI sawipui tura kal ṭha kan ti," an ti.

April 1-3, 2014 chhung khan Tripura refugee camp-a Bru awmte chu Lok Sabha MP inthlan atan vote an thlak tir a, he mi duh loh lantirna atan hian Jt. NGO chuan April 7, zing dar 5 aṭangin darkar 72 awh tur total bandh Mizoram pumah an huaihawt a ni. A ni hnihnaah Mizoram sorkar leh ECI inbiakna chungchang Jt. NGO ten an sawiho hnuah bandh tihtawp a ni.

Bandh tihtawp chhan chu - ECI-in tun hnu reng rengah Mizoram Bru, Mizoram pawna awmte Mizoram inthlanah (MP & MLA) Mizoram chhung ngeia vote an thlak theih nan ruahmanna a siam an intiam vang te; Bru Mizoram mi leh sa dik tak, Tripura transit camp-a awm mekte hi inthlan (Model Code of Conduct) zawh veleh, May 16, 2014 aṭanga chhiara thla thum chhunga Mizorama lak let Mizoram sorkarin a tum nghal a intiam vangte leh Bru, Mizoram mi leh sa dik tak, koh kir leh an nih pawha lo kir leh duh lote chu Mizoram Electoral Roll aṭanga paih/thai bo an nih theih nan Mizoram sorkarin hma lak a intiam vangte a ni.

Nimina Jt. NGO ṭhukhawm chuan Tripura refugee camp-a Bru awmte Mizorama let tura vawi tam tak ruahmanna ṭha tak siam sak an ni pawh a, let duh loa, koh nawn an ngai reng chu ṭha an ti loh thu an tarlang a, "Tripura Electoral Roll-ah awm zui mai tawh se tih hi kan duh dan a ni. An lo let duh lo zui zel a nih chuan Tuikuk repatriation chungchang hi chapter khar a nih theih nan Union Home Ministry dawr ni se," an ti.