CM-in hnam sipaite dawtin min puh - Ex-MNA

Ex- Mizo National Army (MNA) hruaitute chuan nimin khan Aizawl Press Club-ah thuthar thehdarhtute an kawm a, chief minister Lal Thanhawla chu hnam sipaite dawtin a puh thu an sawi.

Ex-MNA president Rochung­nunga chuan May 11, 2018-a Congress Bhavan-a thu a sawi ṭumin, chief minister Lal Thanhawla'n ' hnam sipaite bum chhuaha a puh bakah 'Pu Hawl, rawtuai hâkin kan thi ṭep a, kekawrte mawngṭet lo chu hak tur pawh kan nei tawh lo, khaw­ngaih takin cheng nuai 6 tal min pe thei em tiin min dil a, ka lo pe a ni,' tih a sawi chu dawt chiang tak niin a sawi, "Pu Lal Thanhawla hi hetiang ṭawngkam hmang hian tunge pawisa dil tih leh tu hnena nge a pek tih sawi chhuak turin kan phut a ni," a ti.

Rochungnunga chuan Mizoram tan zalenna sual tura mahni in leh lo an chhuahsan dawn khan tumahin an sawmin, an thlem lo tih sawiin, "Tumahin min bum hek lo. mahni in-volunteer-a chhuak kan ni," a ti a, Lal Thanhawla chu Ex-MNA te hmusit zawnga ṭawng fo tawh lo tura an hriattir thu a sawi.

MLA inthlan lo awm tur atan political party tinten ṭhahnem an ngaih thu sawiin Ex-MNA-te chuan, "Mi ṭhenkhat dawt pawisa loten Mizoram hnam tana an nunna hlu tak hlana martarte leh ram leh hnam chhan nana hrehawm tinreng lo tuartute chu thudik lo leh belhchian dawl lo hmangin a chhe thei ang berin min chhuah a ni. Ṭhangtharten misual rual leh pawisak nei lo ang maia min ngaih theihna turin, zalenna sual lai leh a kaihhnawih chanchin thudik lo tak taka an vawrh­darh hi pawi kan ti takzet," an ti.