Congress sorkar chhungin Mizoramah hmasawnna fumfe a awm lo - Dr. Thangtea
MNF vice president Dr. R Lalthangliana chuan Congress kum 10 an sorkar chhungin Mizoramah hmasawnna fumfe hmuh tur a awm loh thu a sawi.
Dr. R Lalthangliana hian Pangzawl khuaa Khuanghlum community hall-a Political Cum SEDP Training a hmanpuinaah thu sawiin, "Congress kum 10 an sorkar chhung hian hmasawnna sawi tur fumfe an nei lo. Damlo an natna dam hlenna tur ni lo, rei lote chhung atana nachhawkna ang chauh mipuite min pe a, Congress nachhawkna man tlawm chi hi Zoram mipuiten kan dampui zo ta lo," a ti.
MNF Vice President chuan Congress sorkar chu inthlan dawn a ruaiah kawng pui langsar lai siamṭhaah puhin, "An kawng siam ṭhatte hi daih rei lo tur tak a ni," a ti a, mipuite chu kum 9 chhung kawng chhia theihnghilh lo turin a chah.
Kum 2018 hi MNF tan malsawm kum a nih thu sawiin Dr. R Lalthangliana chuan, "Hmun hrang hrangah mithar lawmluh thlipui a tleh hum hum a, tun ṭuma political training nei tura Pangzawla hun hmannaah pawh tum lawk miah lo mithar 143 zet kan lawmlut leh zel hi a mak zo zai hle a ni. Kumin 2018 chhung hian Mizoram pumah mi 17000 aṭanga 20000 inkar vel MNF-ah lawmluh an ni tawh," a ti.
MNF Vice President chuan Congress-in hun harsa leh kawng khirh tak an zawh mek thu sawiin, "Kei Dr. R Lalthangliana ngei pawh hi zan khat thil thuah Congress-ah inlet thut ta ila, 'Congress hi a sorkar zui leh a ngai a ni' tiin Zoram dung leh vang hi fang chhuak vek ta pawh ni ila; Congress tan chuan MLA 5 lak a huphurhawm khawp ang," a ti a, Congress dinhmun chu a chhe hle niin a sawi.