KHAWTHLIR
Centre hawng
Institution of Engineers (India) Mizoram State Centre, IE(I) chu National Institute of Technology (NIT) ah tun hnai khan IE (I) president Sisir Kumar Banerjee-in a hawng. Mizoram centre hi India rama centre 122 na a ni. Mizoram centre-ah hian kum 2018-2020 chhunga chairman atan NIT director Dr. Rajat Gupta leh honorary secretary atan PWD CE K Lalsawmvela te ruat nghal an ni.
Heroin man
Central YMA hnuaia ruihhlo do pawl SRS chuan Nilaini zan khan Lalrinzuali, Hunthar veng inti hnen aṭangin heroin can 19 leh alprozelum engemawzat an an man. SRS te ruihhlo man hi tualchhunga hralhna ang chuan Rs. 1,87,500.00 hu a ni.
Jubilee lawm
Govt. Tlungvel High School chuan Nilaini khan an kum 50 (Golden Jubilee) tlin an lawm a, bialtu MLA Lalrinawma'n a hman pui. MLA chuan zirlaite chu eng pawh ti se, engkima neitu rilru pua ram hmangaih turin a chah. Tlungvel High School hi kum 1968-ah din a ni a, tunah hian thawktu paruk leh zirlai 94 an awm mek a ni.
Tlan khap
Traffic SP chuan thupek chhuahin, Ramrikawn aṭanga Lungverh peng (NH-54) via Sakawrtui-chhun kawngpuiah hian lirthei lian (ke sawm nei) chinte chu rit phur chunga tlan a khap.
Pass lawmpui
MZP, MSU, NSUI, SSU leh ZPM ṭhalaite chuan thuchhuah siamin, nimin HSSLC result chhuaka zirlai hlawhtling zawng zawngte chu an lawmpui thu tarlangin, hlawhtlinna chang ve lote chu an tawrhpui thu an sawi a, beidawng lo turin an chah.
Vawk chaw sem
AH & Vety dept. chuan nimin khan NLUP hnuaia vawk vulh thlangtu New Serchhip huam chhunga mi 88, Hriang-tlang khuaa mi pahnih leh Tlungvel khuaa mi 15 hnenah vawk chaw bag 12 ṭheuh an sem.