Karnataka CM atan BJP hruaitu BS Yeddyurappa lalut Congress-JDS MLA-ten lungawi lohna lantir

Karnataka Assembly inthlan neih zawh taka party mala sorkarna siam thei an awm lo a, Congress leh Janata Dal Secular (JDS) ten thawkdunin sorkar an siam thei tih an sawi hnuah, Governor Vajubhai Vala chuan party mala seat la hnem ber, BJP chu sorkar siam turin a sawm ta zawk a, nimin zing khan BJP hruaitu BS Yeddyurappa chu Karnataka chief minister atan lakluh a ni ta a ni.

Karnataka-a sorkar siam tur hian MLA 112 neih tlin a ngai a, Cong-ress leh JDS thawkdun hian MLA 116 an neih thu sawiin, heng MLA-te signature pawh hi Governor Vala hnenah hian Nilaini khan an thehlut a ni. Mahse MLA 104 nei, BJP pawhin sorkar siam turin thlawptu a nei thei dawn tih sawiin, Governor hnenah hian sorkar an siam theih tur a thlen ve bawk. Nilaini khan Congress-JDS leh BJP aiawhte hian a hran ve vein Governor hi an hmu a, zanah Governor hian BJP hi sorkar siam tur hian a sawm ta a ni. Governor chuan BS Yeddyurappa chu ni 15 chhunga a kaihhruai sorkarin thlawptu a ngah tawk tih fiah turin a ti bawk. BJP chuan independent MLA-ten an thlawp dawn niin a sawi.

Congress, JDS leh party dangte chuan Governor thiltih dan hi an sawisel nasa hle a, ram danpui kalh niin an sawi. Sorkar siam thei MLA nei ngah sa, Congress-JDS te sawm lo a, thlawptu MLA 104 chauh nei BJP a sawm chu democracy palzutna leh ram danpui kalphung kalh a ni tiin an sawi. Congress chuan Nilaini zan vek han Supreme Court-ah pawh hemi chungchang hi a thlen nghal a, judge pathum awmna bench chuan darkar thum chuang zet a ngaihtuah a, mahse CM thar lakluh tur hi a dansak ta lo a, Congress thu thehluh hi vawiinah a ngaihtuah thung dawn a ni.

Congress leh JDS hruaitute chuan BJP hian an MLA-te chu cheng vaibelchhe 100-a tham tumin an thlem niin an lo sawi tawh a ni. Party pahnihte hian Chief Minister atana Yeddyurappa lakluh anih duh lohna an lantir zui nghal a ni.

BJP chuan Governor hian dan ang takin, ram danpui zulzuiin thil a ti niin an sawi a, mahse senior lawyer leh constitutional expert-te chuan governor thiltih dan hi an sawisel thung. Goa assembly inthlanah Congress chu party mala seat la hnem ber a ni chungin,

BJP leh a thawhpuite chuan majority an nei nia an sawi avangin sorkar siam turin sawm a ni a, hetihlai hian Karnataka-ah hian majority nei zawk sawm lo a, BJP sawm a ni thung tih an sawi a, hei hian sum hmanga MLA inlei leh tham theihna hun a hawn phah a ni, an ti.

Kum 75 mi, BS Yeddyurappa hi Karnataka chief minister 23-na leh, CM atana lakluh a nih ṭum thumna a ni. Kum 2007 khan ni sarih chhung chauh chief minister a ni hman a, kum 2008 khan CM atan lakluh leh niin thla 39 sorkar a kaihruai hman a, mahse eiruk thubuaiah man a nih vangin a bang zui a ni.