BJP-in democracy an páwngsual mek - Lal Thanhawla

Chief minister leh Congress party president Lal Thanhawla chuan, sorkar laipuia BJP hruaitu­te'n democracy an páwng­sual mek niin a sawi a, "BJP ho hi an hráng hle, zah pawh an dáwn lo," a ti.

BJP-te chu democracy leh Constitution bawhchhiain an kal mek nia sawiin Chief Minister chuan, "An thil tih hian ṭhatna riau a nei. Political party an palzamte hian thawhho nacháng an hre dawn niin a lang," a ti a; BJP-te chu democracy pawngsual mekah a puh.

Lal Thanhawla sawi danin, inthlan a awmin political party mala sorkarna siam thei an awm loh chuan seat la hnem ber sorkar siam tura koh tur a ni a, thawkhoa sorkarna siam thei an awm erawh chuan seat la tlem zawkte pawh koh tur a ni.

Manipur, Goa, Megahlaya-ah party mala seat la hnem ber sorkarna siam tura koh an ni lo a, Karnataka-ah erawh Governor chu seat la hnem ber sorkarna siam tura kohtir a ni thung. BJP-te'n Chief Minister atana an ruat chu ni 15 chhungin sorkarna a siam theih leh theih loh tichiang tura tih a ni.

BJP thil tih dan chu Congress chuan duh loin, Supreme Court-ah an zualko a; Court chuan vawiin tlai dar 4 hian BJP-in Chief Minister atana a ruat chu majority a neih theih leh theih loh fiahna floor test buatsaih turin a hriattir.

Congress chuan Karnataka-ah JDS nena sorkarna an siam theih laia majority nei lo BJP sorkarna siam tura koh a ni leh, ni 15 chhung hun pek a ni chu an duh lo a ni.

Lal Thanhawla chuan, Mizoram MLA thlan hun tur sawi lâwk theih a nih loh thu sawiin, "BJP-te hian sorkar theih an inrinnaah chuan campaign hun a tlem theihna atan inthlan hun an puang har a, an huphurh deuhah chuan an puang hma thung," a ti.

BJP-te'n Mizoram chu an hu­phurhna hmun a nih chuan inthlan hun an puan hma tur thu sawiin, "An huphurhna hmunah chuan pawisaa mi leina hun tur tam deuh an duh a ni," a ti a; BJP-te chêt ṭhin dan chu kohhrante pawhin hria se a duh thu a sawi.