India ram khawpui fai zingah Biate
Sorkar laipuia Ministry of Housing & Urban Affairs-in Swachh Bharat Mission (Urban) hnuaia India ram khawpui (city leh urban town)-te kum tina faina kawnga inelna, Swachh Survekshan a buatsaihah Biate khua chu Best City in Innovation & Best Practices - NE Zone Award dawng tura thlan a ni.
SBM (Urban) hnuaia Swachh Survekshan-ah hian kumin 2018 hian khawpui 4,203 an inel a, Swachh Survekshan 2018 result chu May 16, 2018 khan Union Housing & Urban Affairs minister Hardeep Singh Puri chuan a puang. Swachh Survekshan intihsiaknaah hian lawmman chi hrang hrang category 52-ah a awm a, Biate khua pawh category pakhatah lawmman dawng tur zingah a tel.
India rama khawpui 4,303 zinga khawpui faiah Biate a lang pha chu hmasawnna ropui tak a nih thu sawiin UDPA minister Zodintluanga chuan, "Central aṭangin khaw fai endiktute lo kalin, tehfung mumal tak duan sa nen an teh hnuah lawmman dawng tlaka Biate an thlang hi a lawmawm em em a ni," a ti a; Biate chu Mizorama census town 23-te fainaa inelna kum 2017-a neihah khaw fai bera thlan a lo nih tawh thu a sawi.
Swachh Survekshan Competition 2018-ah hian khawpui 4,203 zingah nikuma pakhatna lo ni tawh Indore chu a pumpuiah pakhatna a ni a, Bhopal leh Chandigarh-te chu pahnihna leh pathumna an ni.