Museum Day pualin Museum hawng

Mizoram State Mu­seum chuan, nimin khan International Museum Day pualin mipui tan en man awm loin Museum an hawng a, mi ṭhahnem takin an tlawh.

Khawvel pumah museum hrang hrangte'n ni bik, mahni remchan ang ṭheuha a ruala an hman turin International Council of Museum (ICOM)-in kum 1977-ah International Museum Day a puang a; kum tin thupui hrang hrang neia hman ṭhin niin, kumina thupui chu 'Hypperconnected museums, new approaches, new publics' tih a ni.

Mizoram State Museum hian kum 2017-18 financial year chhung khan tlawhtu mi 9,130 an nei a, an zinga mi 24 chu VIP niin, mi 10 chu ram dang mi an ni.

Kum kal ta chhung khan Museum en man aṭangin sorkarah Rs. 50,020 an chhûng lut.

Mizoram State Museum-ah hian gallery paruk a awm a, thil (object) 3,757 an lak khawm tawh zinga 768 chu show case hrang hrang 107-ah pho chhuak a, a bak zawng chu reserve collection-ah an dah thung.

Ranchi-a Tribal Museum, Bho­pal Museum leh Guwahati-a Silpigram Museum-ahte museum object eng emaw zat an pe (donate) tawh a; April 2018 chhung khan Jawaharlal Nehru State Museum, Itangar, Arunachal Pradesh-a pho chhuah turin Mizo hnam ziaráng tar­lang thei tur object 74 an dah bawk.