Citizenship (Amendment) Bill pass loh nan Kan tih theih apiang kan ti zel dawn - Duhoma

Ṭangrual pawl, Zoram Peoples' Movement (ZPM) chief ministerial candidate Lalduhoma chuan, Citizenship (Amendment) Bill, 2016 chu Parliament-ah pass a nih vaih chuan, Buddhist leh Hindu ni ve lote chu rei lo têah chîmral an ni dawn niin a sawi a, "Bill hi an pass hma hian na taka kan nawr a ngai a, pass a nih loh nan ZPM chuan kan tih theih apiang kan ti zel dawn a ni," a ti.

Lalduhoma hian nimin khan ZPM pisaah thu sawiin, "Citizen­ship (Amendment) Bill hi an pass hmain na taka kan nawr a ngai a, an pass hnu chuan engmah kan ti thei tawh lo ang. Kawngte zawh mup mup a hun tawh. Kan Legislative Assembly-ah pawh official resolution pass daih tawh tur hi a ni a, kan MLA-te zingah tumahin private resolution an la thehlut lo," a ti a; hei vang hian MLA ding laite chu thlan nawn leh tlak an nih loh thu a sawi.

Citizenship (Amendment) Bill chu pass a nih loh nan ZPM-in an tih theih apiang an ti zel dawn tih sawiin Duhoma chuan, "Party tinte hian sorkarna chan chu kan duh ṭheuh mai, amaherawhchu, chumi atana eng hmanrua pawh hmang hreh lo nih hi kan duh ve ngai lo," a ti a; Mizote ngei lakah Mizo hnam a him tawh loh avangin, chu'ng mite chu inthlan lo awm turah paih turin mipui a sáwm.

ZNP President chuan, tunah hian Chakma pawl thar, Jonow Shon­gaty Somiti (JSS) a ding tih sawiin, "JSS hian Chakma District Council huam chhung leh Chittagong Hill Tracts chu Chakma rama siam tumin independent an sual mek a ni. Hei vang hian Bill hi Mizote tan a hlauhawm zual a, a dodal nasa ber tur kan ni," a ti.

Lalduhoma chuan, Citizenship (Amendment) Bill chu pass lo tur leh, pass a nih pawhin Mizoram huaptir lo turin August 16, 2017-ah Bill chungchang ngaihtuahtu Joint Parliamentary Committee (JPC) Chairman hnenah memorundum a thehluh thu leh MPC president Lal­hmangaiha Sailo pawhin memo­rundum a thehluh tawh thu a sawi.

Bill dodal zawngin tun thlengin chief minister Lal Thanhawla'n hma a la lo nia sawiin Lalduhoma chuan, "Assam leh Meghalaya CM-te chuan huaisen takin hma an hruai a, an awhawm khawp mai. Kan CM erawh hi chu a buai em mai a, a ká pawh a la áng ve hman lo a, i hrethiam ang u," a ti.

Lalduhoma chuan, tun thlengin Mizorama Congress leh MNF party-te chuan anmahni pualin Citizenship (Amendment) Bill chungchangah memorundum an la thehlut ve loa a hriat thu a sawi a; Bill chu Chakma foreigner nen inkungkaih tlat a nih avangin, MNF leh Congress chu Chakma vote an hmuhna tur a nih chuan, Mizo ram, hnam leh sakhuate chu ral zawk mahse an pawiti loah a puh.