KHAWTHLIR

Thisen pe
Tuikual Branch KṬP chuan an din champha vawi 57-na alwm nan nimin khan Aizawl Civil Hospital tan thisen unit 33 an pe a, a petute mipa 29 leh hmeichhia pali an ni. JL Higher Secondary School NSS pawhin Aizawl Civil Hospital tan an sikulah thisen unit 38 an pe a, a petute mipa 25 leh hmeichhia 13 an ni. Lunglei College NSS-in Christian Hospital, Serkawnah thisen unit 14 an pe a, Bilkhawthlir Auto-Rickshaw Association-in Kolasib Hospital-ah unit 28 an pe bawk.

Kawng hawng
Chanmari leh Chanmari West inkalpawhna kawng Saron Road tih chu nimin khan bialtu MLA Lal Thanzara'n a hawng. Kawng hawn tâk hi metre 200-a thui a ni a, a siamna atan PWD aṭangin cheng nuai 42.37, Social Welfare department aṭangin cheng nuai 34, UDPA aṭangin cheng nuai 12.41 leh mimal aṭangin cheng nuai 1.18 hmuh a ni a, a vaiin cheng nuai 91.18 sen a ni.

Tanpuina hlan
Chief Minister's Rural Housing Scheme under NEDP 2016-17 hnuaia in sak ṭanpuina dawngtu mi 38 hnenah nimin khan Thangburha Hall, East Lungdarah bialtu MLA Vanlalawmpuii Chawngthu-in ṭanpuina first instalment a hlan.

Pass-te lawmpui
Mizoram Youth Commission (MYC) chairman Joseph Lalhimpuia chuan thuchah tichhuak­in, HSSLC Exami­nation 2018-a pass thar ­­zawng zawngte a lawmmpui thu a tarlang a, an hma lam hunah taima zawka an zirna chhunzawm zel turin duhsakna a hlan.

Car chesualah thi
May 17, Ningani zan dar 8 vel khan Aizawl aṭanga aṭanga tlân Ford Endeavor car, Rochungnunga (Marova) s/o Robert Liantluanga (L), Dawrpui ta chu Sialsuk daiah kawng thlangah a lum a, a neitu Rochungnunga a hmunah a thi. Car-ah Rochungnunga hi driver nen an chuang a, driver chu nimin zing khawvar khan kawngpuiah vâk chhuakin, mi dang a hrilh a; mi dangin chetsualna hmun an thlen chuan Rochungnunga hi a lo thi tawh a ni.