Hlo túr leh rannung thahna hlo chungchang CYMA OB-te'n Agri. Minister an sawipui

Central YMA office bearer-te chuan kum 2017-a YMA General Conference vawi 71-na thurel, 'Hlo túr leh rannung thahna hlo hman dan fimkhur leh a nihna anga hman a nih theih Central YMA-in hma la rawh se,' tih bawhzuiin nimin khan Agriculture minister KS Thanga a pisaah an kâwm a, hmalak dan tur an sawipui.

Meeting chuan, Agrilculture department leh CYMA chu kut hnathawktute hmakhaw ngai chungin thawhho ni se an ti a; disterict tinah awareness programme neih an rêl.

CYMA president Vanlalruata chuan, hlo tûrte a nihna ang tak leh fimkhur taka hman a nih theih nan kut hnathawktute nasa lehzuala zirtir a ṭul thu a sawi a, "Agriculture department-te nen ruahmanna siam a, hun lo kal turah thawhhona ṭha tak neih theih a nih dawn avangin a lawmawm hle a ni," a ti.

Agriculture minister KS Thanga pawhin, Agriculture department-in hlo tûr hman danah kut hnathawktu inzirtirna a kalpui mek tih sawiin, "Doordarshan-ahte programme neih ṭhin ni mah se, zau zawka inzirtirna TV leh chanchinbu kaltlanga neih a ṭul a ni," a ti a; hlo tûr hman dan CYMA-in an vei chu lawmawm a tih thu leh CYMA leh Agriculture department-in ṭan an lakho theih a beisei thu a sawi.

Inkawmnaa Agriculture department hotute sawi danin, tun dinhmunah Mizoramah insecticide dealer 33 an awm a, district tinah inspector dah vek a ni. Chemical fertilizer-te chu túr a ni lo a, fimkhur takin a hman dan tur dik taka hman tur a ni a; India ram pum ngaihtuahin, Mizoram chu chemical fertiliser hmang ve mang lo ang a la ni.