MNF-in dâwt sawiah CM Hawla an puh

MNF party chuan thuchhuah siamin, May 17, Ningania Mizoram Congress president Lal Thanhawla, chief minister-in dâwt chiang lutuk a sawi niin an tarlang a, "Pu Lal Thanhawla leh Congress party hian hamṭhatna an hmuh theih dawn chuan dâwt sawi an pawisa lo hle a ni," an ti.

MNF chuan CM Lal Thanhawla'n 'MNF sorkarin tlin an duh luatah sum pawh awm loin district pathum an pe' tia a sawi chu chhangin, "MNF khan sum awm sa vekin ruahmanna fel tak siamin district a din a ni tih kan puang a, Congress sorkar hian a tihlawhling duh lo a ni zawk," an ti a; kum 1998 inthlan dawna Congress sorkarin district panga - Champhai, Kolasib, Serchhip, Lawngtlai leh Mamit an pekte chu ruahmanna leh sum awm sa miah lo nia sawiin, chuti chungin MNF sorkarin a tihpuitlinsak vek niin an sawi.

MNF chuan, MNF sorkarin police batallion thar pali an din tih sawiin, "Mizo ṭhalai 4,000 chuang hna a siamsak a, Congress sorkar kum 10 dáwn hian IR batallion pakhat pawh a din ve thei lo," an ti a; MNF-in IR battalion pali a din theih laia Congress sorkarin pakhat pawh a din thei lo inthlahrungin CM chuan MNF thil tih ṭhat sawi nâwisakin, dâwt a sawi kual ta niin an tarlang.

Lal Thanhawla'n, 'Sum awm loin sikul 400 chuang an upgrade' tia a sawi chungchangah MNF chuan, MNF sorkarin ruahman lâwkna fel thlap loin thil a ti ngai lo a, zirtirtute'n hlawh lâk theih loh an nei ngai lo niin an sawi a, "MNF chu sorkar zui leh ni se hneh takin a enkawl zui ang," an ti bawk.