Inkaihhruaina hman mek pawhsei a ni ; Covid-19 dona atana kalphung thar sorkarin a pawm tawh la hmang lo
SDMA State Executive Committee chairman Lalnunmawia Chuaungo, chief secretary chuan Covid-19 avanga inkaihhruaina order October 1, 2021-a a lo tihchhuah tawh chu October 30 zanlai dar 12 thleng chhunzawm tur a nih thu a tarlang. Hetihlai hian, Covid-19 do dan phung ṭhenkhat thlakna atana kalphung thar tur duang tura din State Level Expert Team on Covid-19 Management rawtnate chu Mizoram sorkarin pawm tawh mah se, he thuziah lai thleng hian an rawtnate hi hman a la ni lo.
Chief Secretary chuan, "Mizoram chhunga COVID-19 darh dan leh mipui zinga hri kai thar awm dan thlirin State Disaster Management Authority chuan inkaihhruaina kalpui mek leh hri kaite enkawl kawnga hmalakna chhunzawm zel chu ṭha niin a ngai," a ti.
Health secretary R Lalramnghaka leh State Level Expert Team on Covid-19 Management member-te chuan October 5, 2021 khan IPR auditorium-ah thuthar thehdarhtute kawmin, kalphung thar tur hrang hrangte an hrilhfiah a ni.
Health Secretary chuan Covid-19 do dan phung ṭhenkhat thlak a nih dawn thu sawiin, "Mipui zawh tawkin kalphung thlak hret ṭul tih a ni. Kan kaldan pangngai chu Covid-19 dona atan a sawt tawk tawh lo tih ngaihdan a lian hle. Kan nitin eizawnna tibuai lo deuh zawngin, tlema inthlandul deuh hlek ṭha tih a ni," a ti.
R Lalramnghaka sawi danin kalphung thar atana rawtna siam turin September 23, 2021 khan Health Principal Director kaihhruai State Level Expert Team on Covid-19 Management din a ni a, team-te'n rawtna an siam chu sorkarin a pawm tawh a ni.
Mizoram sorkarin a pawm tawh State Level Expert Team on Covid-19 Management rawtnate hi media lama puanzar a nih tawh hnuah pawh hman ṭan a la nih loh avangin task force ṭhenkhat chuan harsatna an tawh phah.
Task force hruaitu ṭhenkhatte'n Vanglaini an hrilh danin, kalphung thar anga kal tawh tura ngai an awm a, mahse sorkarin hman ṭan tur a la tih loh avanga hman ṭan a nih loh avangin task force kaldan hrethiam lo lek lek an awm ṭhin.
Hetihlai hian rawtna lut zinga pakhat 'State pawn aṭanga rawn lut entry point-a RAT negative, symptoms nei lo chu quarantine tawh loh tur. Negative pawh symptoms nei chu ni 5 chhung quarantine-a RT-PCR emaw TrueNat hmanga test leh tur' tih chu hman turin order chhuah a ni tawh.