MPCC-in Zoramthanga thubuai chungchangah dikna tung ding tura beihna hun an buatsaih

Mizoram Pradesh Congress Committee (MPCC) chuan nimin khan Vanapa Hall kawtah chief minister Zoramthanga thubuai chungchangah 'dikna tung ding tura beihna' inkhawm an buatsaih.

Inkhawm hi MPCC gen. secretary John Siamkunga'n kaihruaiin, thusawitu PAC member KS Thanga chuan thil dik lo tarlan a, siamṭhat tuma beih chu party-te tih turah an ngaih thu sawiin, "Eng rorelna pawh lo chhuak sela, he thila thil dik lo awmte hi Mizoram mipuiten an hriat a ngai a ni. Mipui sum tlingkhawm chu eiruk a thiang lo a, ram dangah chuan hetiang eiruk chingte hi lung-inah an tang ṭhin," a ti.

KS Thanga chuan an thiltih chu Zoramthanga an huat vang a ni lo tih sawiin, "Politics-a phuba lakna a ni hek lo; politics tih thianghlim tumna a ni a, dikna a parchhuah theih nana hmalakna a ni. Vawiinah hian MNF hruaitute leh member-te tan ngei pawh sawi tur a awm lo, a zahthlak lutuk," a ti a, he thil hian MNF hmalam hun a tichhiat vek theih avangin an tan pawha bei an nih thu a sawi.

Thusawitu dang AMC councillor Rosiamngheta chuan Zoramthanga thubuai aṭanga langchiang em em chu kan value system kan siamṭhat a ngai tih a nih thu sawiin, "Bible-in min hrilh danin sual tinreng bul hi zu ni loin tangka sum ngainat hi a ni. Do tur dik tak kan do ngam miah lo hi kan ramin nasa takin a chhiat phah mek a ni," a ti.

MPCC spokesperson Dr Lallianchhunga tarlan danin, kum 10 chhung leka Zoramthanga hausakna cheng nuai 138 aṭanga nuai 838.41 zeta a pun hman avang leh, a sum lakluh zat leh a hausakna a inmil theih loh avangin June 22, 2007-ah ACB-ah PRISM chuan FIR an thehlut a, chhui phalna pek a nih lawk loh avangin October 10, 2007-ah High Court-ah PIL an thehlut a ni.

September 15, 2010-ah Zoramthanga lakah thubuai thehluh a ni ta a, a huan (Aii Puk) a sorkar bungrua hmanga puhna thubuai siam nghal a ni. Zoramthanga hian bank hrang hrang pakua-ah amah leh a chhungte hmingin account 21 an nei a, life insurance-a an sum dahte nena an pawisa neih zawng zawng hi cheng nuai 441.32 a ni. A ram leh bungraw dang tam tak neihte hlutna chu cheng nuai 625.50 a ni.

ACB-in court-a supplementary charge sheet an thehluh aṭanga a lan danin Zoramthanga sum neih zawng zawng hi cheng nuai 909.70 a ni. Thubuai rei tak ngaihtuah a nih hnuah heng a pawisa neihte hi a unaupa L Nghakliana leh a u fapa Zoramchhana-te'n an sum an kawltir niin an sawi leh ta a ni.