Minister leh MLA-in Sihhmuia refugee camp an tlawh

Power & Electricity (P&E) minister R Lalzirliana leh bialtu MLA Zothantluangate chuan nimin khan Sihhmui refugee relief camp an tlawh a, hmanrua chi hrang hrang an pe.

R Lalzirliana chuan Mizorama raltlan rawn lutte tan Mizo mipuiin theihtawp chhuah an inhuam tih sawiin, "Kan unaute an nih angin Mizoram mipuite'n kan chhawm dawl mek a, raltlante pawhin democracy an duh avanga an tuarnate chu a thlawn mai dawn lo tih an hriat reng a pawimawh," a ti a, an awmna hmun apiangah anmahni lo tuamhlawmtu khawtlang hruaitute rorel dante ṭha taka zawm a, an zai ngai ṭhin turin a chah.

Zothantluanga pawhin thu sawiin,"Kan ṭhenawm ram a buai vanga kan unau himna rawn zawngte hi Mizoram mipuite'n kan theih dan danin kan tuamhlawm dawn a, sorkar dan anga thil tih a remchan loh pawhin a theih dan kawng dap a ni zel dawn," a ti a, a bial chhunga refugee relief camp-te chu khawtlang hruaitute leh tlawmngai pawlte nen a ṭul angin an enho zui dawn tih a sawi.

Aizawl DC Dr Lalhriatzuali Ralte chuan refugee camp a awm thu an hriat hnuah humanitarian ground aṭanga refugee camp-a awm mekte mamawh ngaihtuah ṭan a nih thu a sawi a, "A buaipuitu turin senior officer pakhat chu nodal officer atan ruat a ni a, a pui turin junior officer pahnih ruat an ni bawk. Covid-19 hri leng a la reh loh avangin fimkhur chhunzawm a ngai a, relief camp-a awmte pawhin Covid-19 hri leng laka inkaihhruainate ṭha takin in zawm tur a ni," a ti.

Minister R Lalzirliana hian ama mimal pawisa-a a lei solar home lighting set pali, Bialtu MLA-in buhfai, chawhmeh leh hriak engemawzat leh DC pisa aṭangin pawisa raltlante hi an pe.