KHAWTHLIR

CADC CEM lalut
10th Chakma Autonomous District Council (CADC)-a chief executive member (CEM) palina atana ruat thar Rasik Mohan Chakma (MNF), Borapansury bialtu MDC chu October 14, Ningani khan Chawngtea Art & Culture Hall-ah Lawngtlai district bawrhsap Dr Andrew H Vanlaldika'n rinawmna thu tiamtirin a la lut. Kum 2018 May thlaa din 10th CADC sorkarah hian CEM pali - Shanti Jiban Chakma, Rasik Mohan Chakma (vawi 2) leh Durjya Dhan Chakma-te an awm tawh.

Chawhmeh pe
Tunhnaia Covid-19 kai engemawzat hmuh chhuahna Khawbel khaw hnenah Serchhip Sub. Hqrs. YMA chuan nimin khan chawhmeh chi hrang hrang an pe. Serchhip YMA-in chawhmeh an pekte hi dal kg. 100, chini kg. 50, chi kg. 20, purunsen kg. 25, neutrela kg. 20, tel litre 36 leh artui case 4 a ni.

Tlawhpawh phal lo
Aizawl DC Dr Lalhriatzuali Ralte chuan R Dengṭhuama Hall, Mualpui, Salem Veng relief camp-ah Covid-19 vei hmuh chhuah a pun zel avang leh hri inkaichhawng zel tur venna atan October 14, 2021 tlai dar 5 aṭanga thu leh awm hma chu R Dengṭhuama Hall leh a compound chu phalna nei lo tan tlawhpawh phal loh a nih thu a puang.

Kawng enfiah
Lengteng bialtu MLA L Thangmawia chuan nimin khan Saitual aṭanga Saichal panna kawng blacktop hna thawh mek a hmunah kalin a enfiah a, huntiam chhunga zawh hman a ni ta lo chu pawi a tih thu a sawi. MLA chuan hnathawktu contractor-te chu ṭha tak leh a hma thei ang bera hnathawk zo turin a chah.

Raltlan luhbelh
Hnahthial DC pisa chhinchhiah danin, nimin khan an district-ah Myanmar aṭanga raltlan mi panga an luhbelh a, anni nen hian an district-ah raltlan 2,200 an awm mek. Raltlante hi khaw 11 awmin - Thingsaiah 894, Cherhlunah 168, Bualpui 'H' 151, Ngharchhipah 162, New Ngharchhipah 439, Tarphoah 92, South Chawngtuiah 25, Khawhriah 68, Tuipui D-ah 35, South Vanlaiphaiah pariat leh Hnahthialah 158 an awm mek a ni.