Zirlai tiṭhate chawimawina hlan an ni

Saitual Sub. Hqrs. YMA chuan nimin khan Keifang Venghlun YMA Zawlbukah Saitual district aṭanga tunhnaia zirna-a ti ṭhate chawimawina hun an buatsaih a, Human Resource Development Board vice chairman L Thangmawia, MLA-in a hmanpui.

L Thangmawia chuan zirna kawng zawh mek, hlawhtlinna changte a lawmpui thu sawiin, "Zirna-ah hian thiam theih aiin taimakna leh tumruhna a pawimawh zawk. Hnam dang ṭawng thiam a pawimawh rualin mahni pianpui ṭawng hlamchhiah leh hnualsuat zawnga ṭawng dang thiam chu a pawi thei thung," a ti a, zirna-a hlawhtlinna chang tharte chu an hmalam hun atan duhsakna a hlan.

Saitual Sub. Hqrs. YMA hian Mizoram pum huapa topper leh rank holder mi 17 te hnenah lawmpuina thilpek hlan an ni.