DEO-in polling station tlawh

Kolasib district election officer (DEO) Dr H Lalthlangliana, bawrhsap leh general observer Mohammed Ali Shihab-te chuan October 14, Ningani khan Tuirial bial by-election lo awm tur atana Serkhan, Nisapui, Lungmuat, N Chaltlang leh Bukpui khuaa polling station buatsaihte an endik a, task force leh tualchhung Mizoram People Forum (MPF) hruaitute an kawm nghal.

Dr H Lalthlangliana chuan inthlan ni a darkar hnuhnung ber, tlai dar 5 - 6 inkar chu Sabbath serhte leh Covid-19 hri veite vote thlakna atan ruahman a nih thu leh vote thlak tur pangngai tan zing dar 7 aṭanga tlai dar 5 inkarah vote an thlak fel hman beisei a nih thu a sawi.

Mohammed Ali Shihab chuan vote thlak turte zinga pianphunga rualbanlote chu ngaih pawimawh tur a nih thu leh harsatna awm loa polling station-a vote an thlak theih nan a ṭul anga ruahmanna siam tur a nih thu a sawi.

VLTF leh Local MPF hruaitute chuan by-election neih tura inbuatsaihna avanga hri vei an pun belh lohna tur atan campaign hun chhung hian puipunna tlem thei ang ber huaihawt tura political party-te an duh thu an sawi bawk.