Mizoramah Covid-19 vangin mi 376 thi tawh

Mizoramah nimin tlai dar 5 thleng khan Covid-19 vangin mi 376 an thi tawh a, IDSP tarlan danin, heng zinga mi 315 chu natna dang nei tel (co-morbidities) an ni.

Nimin zinga sorkar laipuiin India rama Covid-19 dinhmun a tarlan danin, Mizoram chu India rama hri vei hmuh chhuah tawh aṭanga thihpui tam lamah a tawp ber dawttu (0.34%) a ni mek a, hri vei hmuh tawh aṭanga thipui tam berna state chu Punjab (2.75%) a ni.

October 13, Nilaini zan dar 10:30 khan Rualkhumi (83), Luangmual, Aizawl chu an chenna inah a thi a, natna dang nei a ni. October 13 khan hri a kai tih hriat chhuah a ni.

Chhawnthanga (73), Bawngkawn chu October 14, Ningani zan dar 8:45 khan ZMC-ah a thi a, natna dang nei sa a ni. September 30 khan hri a kai tih hriat chhuah niin MINECO DCHC aṭangin October 7 khan ZMC-ah dahluh a ni.

Dr C Dozuala, Venghlui, Aizawl chu nimin chawhnu dar 1:15 khan Mualpui DCHC-ah a thi a, natna dang nei tel a ni. October 13 khan hri a kai tih hriatchhuah niin hemi zan hian DCHC-ah admit nghal a ni.