Lawngtlai DC-in Chawngte a tlawh

Lawngtlai district bawrhsap Dr Andrew H Vanlaldika chuan October 14, Ningani khan Chawngtea Health department, Police department leh Chakma Autonomous District Council (CADC) official-te, Central Young Chakma Association, Chakma Mahila Samiti leh Mizoram Buddhist Association hruaitute a kawm a, CADC-a Covid-19 dona leh vaccine pek dan an thlirho.

Andrew H Vanlaldika chuan hri leng dona kawngah sorkarin amahin thil a ti thei lo tih a sawi a, "Kohhran, tlawmngai pawl leh mipui ṭawiawmna a mamawh a, ṭanrualna nen hripui chu do hneh theih a ni," a ti a, CADC-a sorkar hna thawk leh pawl hrang hrangte chu theih tawp chhuah zel turin a chah.

Health department thawktute chuan CADC huam chhunga vaccine pek chungchanga harsatna an tawhte an sawi a; fur laia tlawh pawh hleih theih loh khua engemawzat a awm thu leh ruahtui hul hunah chu'ng khuate chu tuam chhuah an tum thu an sawi.