Sorkar laipui scheme hnuaia hmasawnna hnathawh thlirho

Khawzawl District Development Coordination and Monitoring Committee (DISHA) meeting hmasa ber chu Ningani khan video conferencing hmangin an chairman C Lalrosanga, Lok Sabha MP kaihhruaiin neih a ni a, co-chairman K Vanlalvena, Rajya Sabha MP; bialtu MLA L Thangmawia, bawrhsap CC Lalchhuangkima leh sorkar hotute an tel.

C Lalrosanga chuan Khawzawl district tana Ministry of Rural Development hnuaia hmasawnna hna thawh hrang hrangte thlirhona DISHA meeting ṭum khatna neih a ni chu lawmawm a tih thu a sawi a, "DISHA hi mipui thlan hruaitute (elected representatives) leh sorkar hnathawkte'n ṭha zawka hmasawnna hna an thawhho theihna tura forum pawimawh tak a ni," a ti a, district hmasawnna atana hmang ṭangkai turin member-te a chah.

Meeting-a tarlan danin kum 2021-2022 (first leh second quarter) chhungin Khawzawl DRDA hnuaia khaw 38-ah MGNREGA hmangin job card nei chhungkaw 8,472-te chu hna chi 601 hmangin ni 58 an inhlawh tawh a, inhlawhna pawisa cheng nuai 1,138.26 chu job card neitute bank account-ah thun a ni tawh.

PMAY-G hnuaiah Khawzawl district-ah in 51 sak zawk tawh a ni a, insak ṭanpuina dawng tur chhungkaw 719 thlan leh tawh niin sorkar laipuiaṭangin ṭanpuina pawisa dawn thuai beisei a ni. SPMRM hmangin Khawzawl rurban cluster-a khaw 13-te tan CSS dangte leh Critical Gap Funding hmangin hmasawnna hna hrang hrang - agriculture link road, solar street light, playground laih, tomato chin, village organisation in sak, internal road siam leh a dangte thawh mek a ni.

MzSRLM hnuaiah kum 2021-2022 chhungin SHG panga din thar a ni a; PMGSY kaltlangin khaw hrang hrang inkalpawhna tur kawng km. 116.01 a thui, cheng vaibelchhe 105.60 hmangin thawh mek a ni. PHE hnuaiah NABARD loan hmangin khaw pasarihah Water Supply Schemes thawh mek a ni a; JJM hnuaiah Riangtlei leh Lungtan khaw tan Water Supply Scheme thawh zawh tawh a ni. DDUGJY hnuaiah P&E department kaltlangin power supply ṭha zawk pek a nih theih nan hna hrang hrang thawh a ni.

PMAY-U hnuaiah Khawzawl, Khawhai leh Biate aṭangin insak ṭanpuina dawng tur chhungkaw 2,072 an awm mek a, chhungkaw 896 in first instalment an dawng tawh, PMEGP hnuaiah kum 2021-2022 chhungin margin money cheng nuai 100 hmanga eizawnna bul ṭanna tur project 40 atan ṭanpuina pek tum niin, tun dinhmunah project 30 thlan a ni tawh.