NHM nurse-te ngaihsak phut

ZPM Ṭhalai chuan thuchhuah siamin, National Health Mission (NHM) hnuaia hun rei tak thawk nurse-te ngaihsak tura Mizoram sorkar an phut thu an tarlang.

NHM hnuaia thawk nurse ṭanglai mek Mizoramah 300 chuang an awm mek tih tarlangin ZPM Ṭhalai chuan, "Kum 15 chuang thawk tawh mi 42 leh kum 10 chhung thawk tawh mi 70 zet an awm mek a ni. Heng NHM hnuaia thawkte hi Mizoram hmun hrang hrangah an awm darh a, Covid-19 leng mek lakah pawh kan hman rim leh thawhhlawk ber an ni a, mipuite thlamuantu ber an ni,“ an ti.

ZPM Ṭhalai chuan nurse-te dinhmun kan sorkâr hrawn mek hian a ngaihsak tawk lo hlea a lan thu tarlangin, "An dinhmun chhiatzia leh mangan thlakzia pawh vawi duai lo Health Minister leh Chief Minister hnenah an lo thlen tawh ṭhin. Chuti chung chuan, sorkâr lakah thu lawmawm engmah an la dawng thei chuang lo," an ti a, kum rei tak an thawh hnu pawha MR pawh an bill thei lo chu an khawngaihthlak thu an sawi.