Hmarchhaka hri vei hmuh tamna ber Mizoram

October 14, Ningani khan Mizoramah Covid-19 hri kai leh kai loh endikna chi li hmangin sample 6,945 endik a ni a, hri vei hmuh thar 901 (12.97%) an awm. Hei hi hun eng awm chen hnua (Pathiannia Covid-19 report tiam loin) hri vei hmuh chhuahin 1,000 a tlin loh ni a ni.

Mizoramah Ningani khan hri vei hmuh chhuahin 1,000 tling lo mah se, hmarchhak state pariat zinga hri vei hmuh tam berna leh India rama hri vei hmuh chhuah tamna state/UT-ah palina a ni thung.

Nimin zing dar 8-a sorkar laipuiin India ram Covid-19 report-a tihchhuaha a lan danin, Ningani khan Assam-ah hri vei hmuh chhuah thar 207, Manipur-ah 69, Meghalaya-ah 87, Sikkim-ah paruk, Nagaland-ah pakua, Arunachal Pradesh leh Tripura-ah pali ve ve an awm a, hei hi Mizoram hri vei hmuh chhuah 901 nen a vaiin 1,287 tling. Ningania hmarchhak state pariata hri vei hmuh belhkhawm aṭanga 70% chu Mizoram aṭanga hmuh chhuah a ni.

Mizoramah hri vei hmuh chhuah tawh aṭanga enkawl mek dinhmun (percentage) chu a tlahniam zel a; October 10, Pathianni zing dar 8-a sorkar laipui report-ah Mizorama enkawl mek chu 14.77% a ni a, Thawhṭanni zingah 13.47%, Thawhlehni zingah 13.37%, Nilaini zingah 12.78% leh nimin zing khan 12.28% a ni tawh. Hetihrual hian Mizoram chu India rama hri vei hmuh chhuah tawh aṭanga enkawl mek tam berna state a ni chhunzawm zel thung. Mizoram hnaih bertu Kerala state-ah chuan hri vei tawh aṭanga enkawl mek chu 2% niin, Mizoram nen a inthlauhna chu 10.28% lai ala ni.